عن إنسان و ........ في صراع دائم

• هموم الدنيا هي اللي عملت فينا هكا موش احنا اللي عملنا هي اللي قاعدة تخرج منا في حاجات عمرها ما خرجت .... وقت كلب اللي يخلي قلوب طيبة طاهرة تنطق بما لا تبطن .... ناس عايشة بمنطق الذيابة في غابة هي اللّي خلات الانسان اللي في قلوبنا كل يوم يموت أكثر .... احنا ما عملناش و هوما اللي عملوا فينا احنا ما غلطناش هوما اللي غلطوا .... احنا ما انجموا نكونوا كان احنا رغم الظيم و الهمّ .... ما فيها باس كي نتنازلوا و نعفسوا على قلوبنا شوي على خاطر اللي طارح روحه يصلح , و يصلح روحه قبل ما يصلح في العباد المحيطة به و المجتمع , يلزمه يتغاظى و يتنازل و يرمي و يقرا الباهية قبل الخايبة و أهم حاجة يقرا القلوب و أحاسيسها قبل الأفعال الطائشة .... خلّونا نحافظوا على ما تبقى من الإنسان بداخلنا باش انجموا  انكملوا و كلكم تتسائلوا كيفاش انجموا نكملو كيفاش نكونوا نحنا رغم كل شيء ..... لكننا نسينا حاجة مهمة برشا اللي في داخل كل واحد منا انسان ووحش في نفس الوقت .... الزوز ديما يتصارعوا و يتخاصموا و كل واحد منهم يحاولوا يكون هو سي السيد في داخلك .... يحب يكون هو ملك الامر المطاع ساهلة برشا الحكاية يا تحب روحك ياتحب الناس .... و هذوما حاجتين ما يتلاقاوش ديما لأنه في جوهر الامور نحن انسان و في هذا حكمة لن ابحث عن مردها و من ورائها .... لكني باش نلوج انطلاقا من التاريخ موش احنا نقولوا على ارواحنا ابناء التاريخ ولا حتى هذه باش تنكروا فيها باش نحاول ننبش في صفحاته الناصعة و الامسخة علاش كل واحد كتب اسمه فيه اختار طريق مختلف على الاخر علاش جيفارا كان جيفارا و هتلر كان هتلر و الاسكندر الاكبر كان الاسكندر اللي اسمه ماماتش لليوم علاش جنكيسخان اللي ملاه العالم دم لليوم قاعد يذكر صحيح موش قاعد يشكر لكن قاعد يذم لكن يذكر و هو مثال حي على الانسان اللي خرج الوحش في داخله ..... حكيتلكم قبلها على جيفارا اللي كيها اليوم حتى من الناس اللي حاربها و حارب افكارها تمجد ذكراه جيفارا اللي نجح في انه يحافظ على الانسان في داخله رغم كل شيء و كل ماكان و كل ماصار و رغم اغراءات السلطة اللي رماها وراه في يد رفاقه في كوبا و اختار خط الثورة و البحث عن حق الانسان بافريقيا السوداء التي لاتمت له باي صلة .... يمكن يكون الللي كتبته تخضريت تخلويض أو بالمعنى الأصح هرطقات فكرية حتى الكلام ماكانش مرتب و لا موزون حبيت يخرج كيما هو في القلب التائه الحائر ..... القلب اللي يكتبلكم اليوم في صراع كبير في داخله بين ذلك الإنسان و الوحش في ذات الوقت .... صراع امله فيه كبير ان ينتصر هذا الإنسان  المثقل المتعب على ذلك الوحش الذي لا يزال ينتظر فرصته للإنقضاض ....